HADEES ONLINE
Read Hadees Online
Sahih Bukhari > Bab 3 > Hadees No. 66
Hazrat Abu Morra Akil Bin Abi Talib ne Inhe Abu Vakidullays se khabar di Ke ( Ek Martaba ) Rasulallah (s.a.w) Masijd Mai Tashrif farma the Aur Log Aap (s.a.w) ke Ird Ghird Baithe hue the ke Teen Aadami vaha aaye . (In Maise ) Do Rasulallah (s.a.w) ke SamnePohanch gaye Aur Ek vapas chala gaya . (Ravi kehte hai ke) Fir Vo Dono Rasulallah (s.a.w) Samne Khade ho gae . Is ke baad un mai se ek ne (jab) majlis mai ( jab ek jagah jab) gunjaish dekhi , to vaha baith gaya aur Dusra Ahle Majlis ke pichhe baith gaya aur Tisra Jo tha vo Lot Gaya . To Jab Rasulallah (s.a.w) (Apni Guftagu se ) Farig hue (To Sahaba (rd) se ) Farmaya ke " kya mai Tumhe Teen Aadamiyo ke bare mai na bataoo ? ... To ( Suno ) In Mai se ek ne Allah se panah chahi , Allah ne use panah dee , Aur Dusre ko sharam aae to Allah bhi us se Sharamya ( ke ise bhi bakhsh diya ) Aur teesre Shakhs ne muh moda , To Allah ne (Bhi) us se Muh Mod liya ."
Sahih Bukhari > Bab 3 > Hadees No. 67
Hazrat Abdur rehman Bin Abi Bakrah ne Apne valid Se Nakl kiya ke Vo Ek Martaba Rasulallah (s.a.w) ka tazkira karte hue kehne lage Ke Rasulallah (s.a.w) apne Oont(camel) par baithe hue the aur ek shakhs ne uski nakil tham rakhi thi , Aap (s.a.w) ne puchha "Aaj ye kaunsa din hai ? "
Ham Khamosh rahe , hatta ke ham samje aaj ke din ka Aap koi dusra naam us ke naam ke ilava tajveez farmaenge , (fir) Aap (s.a.w) ne farmaya , " Kya Aaj kurbani ka din nahi hai ? " Ham ne arz kiya " Beshak "
(Iske baad) aap (s.a.w) ne Farmaya , " Ye Kaun sa Mahina ha ? "
Ham (is par bhi ) Khamosh rahe aur ye (hi) samje ke is mahine ka (bhi) aap is ke naam ke ilava koi dusra naam tajveez farmayenge .
Fir Aap (s.a.w) ne farmaya , " Kya Ye Zulhijjah ka mahina nahi hai ? "
Ham ne Arz kiya " Beshak ! "
Aap (s.a.w) ne Farmaya , " To Beshak tumhari jaane aur tumhare Maal aur Tumhari Abru , tumhare darmiyan isi tarha haram hai jis tarha aaj ke din ki hurmat tumhare is mahine aur is shaher mai hai . Pas Jo shakhs hazir hai use chahie ke Ghaeeb ko ye (baat) pahuncha de , Kyunke esa Mumkeen hai ke jo shakhs yaha mojood hai vo aese shakhs ko ye khabar pahunchae , Jo is se ziyada (hadees ka ) yad rakhne vala ho .
Sahih Bukhari > Bab 3 > Hadees No. 68
Hazrat Abdullah ibne Mas'ood (rd) se Rivayat hai ke
Rasulallah (s.a.w) ne hame naseehat farmane ke liye kuchh din mukarrar kar diye the is dar se ke kahi ham Ukta na ho jaae ."
Sahih Bukhari > Bab 3 > Hadees No. 69
Hazrat Anas Bin Malik (rd) se Rivayat Hai ,
Rasulallah (s.a.w) ne farmaya ,
"Aasani karo aur sakhti na karo aur khush karo aur nafrat na dilao ."
Sahih Bukhari > Bab 3 > Hadees No. 70
Hazrat Abu Vaeel Se rivayat hai ke Abdullah (ibne mas'ood) (rd) har jumma Ra't ke din logo ko vaeez sunaya karte the . Ek Aadami ne un se kaha " Ae Abu Abdur rehman ! Mai chahata hu ke tum hame har roz va'z sunaya karo . " Unhone farmaya , " To sun lo ke muje is amr(kaam) se koi chiz mane (rokne vali) hai to ye ke mai ye baat pasand nahi karta ke kahi tum tang na ho jaao , aur mai va'z mai tumhari fursat ka vakt talash karta hu , jaisa ke Rasulallah (s.a.w) is khayal se ke ham ukta na jaae , va'z ke liye hamare aukat-e-fursat ka khayal rakhte the .